Wann d’Zesummenaarbecht iwwer d’Grenzen erausgeet: d’Kläranlag Eisch-Amont
All Dag passéieren Dausende vu Grenzgänger d’Grenz tëscht Lëtzebuerg an der Belsch fir op d’Aarbecht ze fueren. Mä d’Zesummenaarbecht tëscht deenen zwee Länner geet wäit iwwer d’Mobilitéit eraus: Si spillt och eng wichteg Roll beim Schutz vun eiser Ëmwelt an eise Waasserressourcen.
Wosst Dir, datt d’Ofwaasser aus verschiddene lëtzebuergeschen Uertschaften an der Belsch behandelt gëtt? D’Kläranlag Eisch-Amont, déi bei Stengefort op belschem Territoire läit, ass e ganz gutt Beispill fir eng erfollegräich grenziwwerschreidend Zesummenaarbecht.
D’Anlag gouf 2021 a Betrib geholl a konnt duerch eng Partnerschaft tëscht dem SIDERO, IDELUX Eau an der SPGE (Société publique de Gestion de l’Eau) realiséiert ginn. Dëse Projet gouf duerch de europäesche Programm Interreg Groussregioun substantiell ënnerstëtzt, deen iwwer 6,5 Milliounen Euro zur Finanzéierung bäigedroen huet. De Gesamtinvestissement louch bei 17,6 Milliounen Euro.
Eng Kläranlag fir e grenziwwerschreidend Anzuchsgebitt
D’Kläranlag ass op eng Kapazitéit vu 15.600 Awunnergläichwäerter (Équivalents-habitants) ausgeluecht. Si behandelt d’Ofwaasser aus de lëtzebuergeschen Uertschaften Hoën, Koler, Klengbetten, Stengefort, Grass, Féngeg a Kënzeg. Op belscher Säit si Sterpenech a Rosenberg schonn ugeschloss, wärend den Uschloss vu Sélange aktuell an der Maach ass. Weider Projete gesinn Uschloss vu Barnich an Autelbas vir. De Kollektor an de Reeniwwerlafbaseng fir dës zwou Uertschafte goufe rezent vun de belschen a lëtzebuergeschen Autoritéite guttgeheescht.
D’Ofwaasser gëtt iwwer e grenziwwerschreidend Netz vu Sammler bis bei d’Kläranlag transportéiert. Do gëtt et mat engem biologesche Behandlungsprozess mat aktivéiertem Schlamm gebotzt, éiert et am Aklang mat den Ëmweltvirgaben nees an d’Äisch ageleet gëtt.
Eng Zesummenaarbecht am Déngscht vun der Ëmwelt
D’Kläranlag dréit nohalteg dozou bäi, d’Waasserqualitéit vun der Äisch an, weider ënnen am Laf, och déi vun der Musel ze verbesseren. Andeems d’Ofwaasser an enger moderner a performanter Infrastruktur behandelt gëtt, kënnen déi belsch a lëtzebuergesch Partner hir technesch Moyenen optimal notzen a gläichzäiteg de Schutz vun de Gewässer weider stäerken.
Dëse Projet weist op eng konkret Aart a Weis, datt Flëss keng administrativ Grenze kennen. Hire Schutz erfuerdert eng gemeinsam Visioun an eng enk Zesummenaarbecht tëscht allen Acteuren.
D’Kläranlag Eisch-Amont ass domat e konkrete Beweis dofir, wéi grenziwwerschreidend Zesummenaarbecht zu enger nohalteger Waasserbewirtschaftung an zum Schutz vun eiser Ëmwelt bäidroe kann.
